Hikayat: Meusé Lam Harô Hara

Uléh: Sjamsul Bahri Atjèh Sumatra

 

Salam ’alaikoem wahé rakan meutuwah

Saleum lôn leupah keu gata dumna

djaro lôn beuet harap meulimpah

ubé na salah n’eu peumeu’ah sigra

      

       batjut lôn rawi kolam gata meutuwah

       bumo kinanah lam harô hara

       le that ureung njang ka rhô darah

       meusabab ulah gadoh meuphôm agama

 

sino ngon sidéh gop dipeu salah

sang dro njang pah laén tan na guna

hana lé teuingat keu amanah Rasulullah

geu yuë peuna mahabbah sabé syèdara

 

      peulom buët peu kaphé atawa khawanah

      bèk salah peugah meunyo dali hana

      beu teugoh teugoh nibak ta meulangkah

      saweub narit asai hah hah le njang tjeulaka

 

nanggröe meusé jino nanggröe hadharah

bumo wali Allah tanoh ambiya

ureung lam nanggröe seumatéh keu Allah

bah pih meu plah plah kolam djak tjok kuasa

 

      bah pih ka meunan Nanggröe that soesah

      takheun Alhamdulillah ngon ta saba saba

      mantong na ulama njang tukang peu siblah

      ta sokong leupah njan Azhar mulia

 

Imamul Akbar syèh ahmad tayéb ta tjinta leupah

bèk na njang peusalah saweub njan ulama

moral ngon gurè ta ingat beu bagah

mangat na barakah ileumé njang na kolam gata

 

      meubèk tajuruët njan bulôh beukah

      teu sië djaröe adöe djitubiët darah

      meunjo hana meuphôm meubèk ta peugah

      silap langkah gata tjeulaka

 

ubé na tjabeung lam Azhar meutuwah

dari phôn djami’ah sampöe haiah kibar ulama

ureung njan bandum ka saboh fikrah

lagè njang ka geu peugah lé syèh tayéb mulia

 

     meutamah saboh treuk masjaikh thuruq shufiah

     pih geu peu saboh fikrah ngon syèh Ahmad tayéb peugah

     haba lôn peutrôh kon asai ka meu hah

     meutapi pëu njang ka geu surah lé wazir awqaf duktur mukhtar jum’ah

 

wahé bansa lôn Atjèh seuramöe meukah

dröe njöe tapeu siblah dari fiteunah dônja

peukara di meusé djino geukheun lé syèh Ali djum’ah

nakeuh sijasah kon peukara peuancô agama

 

       bèk asai na djanggôt ka ta ikôt bagah bagah

       kadang meu ‘iëk gohlom gèt djirhah kadjak peugah dro ulama

       beugèt tamumat kolam ahlussunnah wal djama’ah

       As’arijah Maturidijah kon njan nabitah wahabijah

 

tameulakè nibak po teuh Allah

beu bagah geu peuglah dum harô hara

beu meuriwang teuma i’tikeud njang sah

quran ngen sunnah tameuphôm reot ulama

Allahyarham Dr.H. Hasballah M. Saad,Ms

Alhamdulillah ta syuko rahmat

Buleuen keuramat ujong   rab  teuka

Mudah-mudahan bandum seulamat

Meuteumeung niekmat Lailaton Kada

Dalam Serambi ban nyoe dimuat

Beurita hangat trok di Jakarta

Geuwoe kolam Allah Hasballah Saad

Nyang kalheueh geumat Menteri Negara

Soe katrok ajai beukai ka tamat

Walau si dikala cit tanggoeh hana

Tanyoe meudo’a talakee rahmat

Hasballah Saad beulam  bahgia

Niet ulon dongeng mudahan mangat

Nyang na mamfaat keu ureueng muda

Dum aneuk Aceh beukong seumangat

Hasballah Saad boeh keu neuraca

Tacok keu cunto saboh meuneumat

Ngat kong seumangat udep lam donya

Jeuet lon kheun meunan  bit na alamat

Hasballah Saad ureueng udep jra

Bah pih ‘oh rayek   pangkat dum  geumat

Tapi kon mangat yoh phon useuha

Lam meut’ie tu’ie hantom na mangat

Namun seumangat sebe meunyala

Seumangat juang pantang khianat

Udep lam himat tan putoih asa

Bak pihak gasien hansep ‘geuranat’

Bunda geuintat kolam Tuke kaya

Yue bantu-bantu meukat bu mangat

Asai ek tamat  kolam jak Sikula

Bak Hasan Raden Warong  meugah that

Lam Meulo teumpat toe ngon Keumala

Bak Warong Bu nyan tantrep geumumat

Sabab meukarat kolam jak Sikula

Warong Bu Tuke Sen leubeh geuminat

Hasballah Saad pinah keureuja

Sinan  Nyak Ballah trep that meukeumat

SMP   final na  lhee thon  lama

Ban poh peuet malam tugaih ka geumat

Taguen ie leugat ku U seureuta

Sabab warong nyan kagob  thee mangat

Bu Guri meuhat ngon bandeng hana

Bu Guri beungoh rame  nyang hajat

Hasballah Saad ku U tiep masa

Ie seu uem kaju   sue U ka lumat

Santan kasep that siploh boh U na

Sinyak Hasballah jak manoe leugat

Lheueh  nyan  beurangkat  ubak Sikula

Meunankeuh sabe tanpre tiep  saat

Hasballah Saad jeumot lagoina

Guru  geusayang sabab carong that

Tuke geuangkat lagee aneuknda

Tamat SMP  lom SGB sambat

Mantong di teumpat Lam Meulo juga

Hanya lam  lhee thon SGB tamat

Lheueh nyan diangkat guru Sikula

Jeuet Guru SD  padum thon meuhat

Bak saboh teumpat nan Gampong Langga

Ngon gampong Lameue hana jeuoh that

Meunyo ta sipat limong batee na

Sayang   ‘oh ujeuen jalan rhub sangat

Gari han liwat bhan tan meuputa

Nibak siuroe cit na lon lihat

Hasballah Saad payah jak ngon pha

Geusadeue  Gari Keude Cut Amat

Langkah geuangkat  u gampong Langga

Lon murid SD di Lameue teumpat

Glah nam rab final yohnyan Sikula

Teukeudirollah kolam saboh saat

Tuhan bri rahmat keupada hamba

Dipeugot kursus keu guru leugat

Lam Meulo teumpat nan jih KGA

Kursus lhee buleuen hana trep tamat

Hasballah Saad luloih lumboi sa

Tugas mencar ilmu laju  meundapat

Kuliah meuhat keunoe u Banda

Trok   Banda  Aceh  lanja  terlibat

Ketua Senat kolam FIP ngon  sigra

Nibak HMI nyan pi that hibat

Laju meucrab-crab maju lagoina

Sekretaris DEMA  kolam akhe pangkat

Lheueh nyan padum  at  tamong penjara

Teubiet totopan Dosen diangkat

Aktif ulet that   meumacam rupa

Ban Reformasi   maju leupah  brat

Meuteumeung pangkat meuganda-ganda

Anggouta KPU lom DPR    Pusat

Hasballah Saad duek di Jakarta

Buet Presiden Gusdur teuma geuangkat

Menteri HAM  geumat phon-phon baro na

Seb ‘ohnoe dilee ka lon peutamat

Jeuet cok mirip hai aneuk muda!!!

Neubri Ya Allah meuribee rahmat

Hasballah Saad   beulam Syuruga

Wahe  rakan lon timu ngon barat

Mohon beule that neu lakee do’a

Amiinn!!!

Oleh: T.A. Sakti

Sumber harian serambi indonesia

Surat U Gampong

Credit Photo : http://muhammadelhami.blogspot.com

Assalamu’alaikom hai Ummi payong

Sambot saleuem lon aneuk di Yogya

Aneuk meukhaba lam syae panton

Gantoe jak kunjong duek peugah khaba

Neu niet ka lon woe keunoe u gampong

Katrok lon kunjong Ummi mulia

Nyang keuh meukeusud  surat lon suson

Gantoe tubuh lon keunoe trok teuka

Deungon idin Po Tuhan ghafuron

Lam sihat dilon sideh di Yogya

Harap meunan cit Ummi di gampong

Brile Ghafuron sihat sijahtra

Lon kira-kira lon hitong-hitong

Leubeh dua thon ulon di Yogya

Jak tuntut ilmee Sikula lambong

Lon tinggai gampong di Pulo Ruja

Bah tinggai siat rumoh dileuen Krong

Aneuk kumuen Butong ka tanle Apa

Lon tinggai Ummi dan Cutbang Beutong

Lon cuba  arong di Tanoh Jawa

Saket ngon mangat semoga meuphom

Leupie ngon tutong mangat lon rasa

Cit sidroe jatoe jak meukat untong

Beu Allah tulong jarak ngon bahya

Bacut lon rawi dongeng dua thon

Kriban nasib lon di Tanoh Jawa

Saket ngon mangat bandum meuhimpon

Ban Jingki ek tron top pade aka

Meujan-jan  jiek  meujan-jan jitron

Meusinthob punggong saket lagoina

‘Oh watee jiek lam awan lambong

Teuseunyom ulom seunang leupahna

Meujan-jan pijuet meujan-jan tumbon

Naban boh rom-rom watee puwasa

‘Oh watee pijuet tijoh ie idong

Dipruihle Lutong  teugeng lam paya

Meunan umpama dongeng nasib lon

Lawet duwa thon di Yogyakarta

Meutuka gantoe sijuek ngon tutong

Umpama bakong dalam ceureupa

Le that peue bagoe hantomle lon com

Leubeh duwa thon hantom lon rasa

Watee Puwasa tan boh meurom-rom

Tan timphan balon jan Uroe Raya

Apam Timphan Iem Leugok Tumpoe phon

Karab trok lhee thon meulon ngieng hana

Beulacan uriek Beureukiek tumbon

Kuwah on  Murong di Jawa hana

Bulukat tuhe Tape breueh Grong-Grong

Ticah boh Jantong sang mangat raya

On mulieng reundang phek pisang glang cron

Leumang meusarong pihtan di Yogya

Ungkhui dan payeh beureuteh apom

Tantoe ngon ulon geuleupak geumpa

Khanduri atot dan malod kolam thon

Pheh peunoh dilon hantom lon rasa

Buhu lon balek titek lon ubah

Meusambong dongeng seun-seun sibanja

Meunyo lagee sot hanagot surah

Bahle meupayah peucanek haba

Keuhai teumon bu bacut lon peugah

Leupah that sosah di Yogyakarta

Eungkot that jareueng dilob lam babah

Laot bahrullah jarak lagoina

Nyang kayem that-that singgah lam babah

Boh manok teuplah dan tahu tempa

Bak warong padang jan-jan lon langkah

Na sie meugapah dan eungkot buta

Teuma watee nyoe teukeudirolllah

Masok lam babah peue-peue nyang teuka

Bu hana eungkot lagot ka keumah

Trok lhee go tamah gohlom meurasa

Meunan keuh bagoe hudep ‘Abdullah

Seunang ngon sosah lawet di Jawa

Beuthat beumeunan di Mi bek gundah

Si aneuk pengecap dalam bahgiya

Ureueng di ranto cit meunan ulah

Seunang  ngon sosah patot jirasa

Ngat batat bacut bek leumiek leupah

Raya faidah keu pangkai tuha

Adak tan wasiet kolam Mi meutuwah

Jadeh peuwoe sah si dara Jawa

Atawa Bali tari dum ceudah

Khaba jipeugah bahsa Indonesia

Nyan bacut khaba tutop beurakah

Meuneu’en pengecap kegura-gura

Simantong hudep meugrak-grak langkah

Wasiet  Ummi sah teutap lon jaga

Di lampoih Tanjong timoh Kumili

Di Padang Tiji asrama tantra

Surat lam syae laju lon rawi

Meuganti-ganti kon lagee  nyangka

Bak Ummi payong ulon peugah kri

Bacut lon rawi keu bhaish Sikula

Kuliah kabeh nyang nan teori

Tinggai Skripsi dan jak lam desa

Bak Cutbang Butong  neuci neusudi

Peue nan areuti nyang lon calitra

Lon peunyuem-peunyuem lon hitong hari

Nam buleuen lagi gohlom cit gisa

Bak mita materi peugot Skripsi

Lon ula-ili Solo dan Jakarta

Hansep sigo jak ban gob peugah kri

Gohlom ulon ci alehnyo beuna

Mudah-mudahan ngon do’a Ummi

Bekna nyang deungki akan aneuknda

Beutrang pikeran lapang ngon hati

Peugot Skripsi rijang seunia

Meujan teuseureh di dalam hati

Pakon treb lawi jawaban Sikula

Umpama Tupe ka lape gigi

Han ekle nari leumoh anggeeta

Bahthat beumeunan ngon idin Rabby

Beu ek lon ili beutrok kolam punca

Umpama ureueng geupula campli

Tinggai pot biji pasoe lam ija

Sang kaseb ‘ohnoe dongeng lon rawi

Panyang sikali ka gadoh makna

Gantoe ulon woe pajoh khanduri

Bak Malod Nabi dan Uroe Raya

Gantoe Makmeugang pajoh sie sapi

Nyoe surat ini keu tanda mata

Lon lakee meu’ah  sujud   t’akdlimi

Keupada Ummi nyang that mulia

Beuna lam sihat sabe Allah bri

Meureumpok nanti deungon aneuknda

Wassalamu’alaikom kalam intahy

Ka habeh cakri ‘Abdullah Yogya

*Hikayat ini ditulis oleh Dto. Abdullah Bin Sulaiman dalam Bahasa Arab Jawi di Yogyakarta, 1 Jumadil Awwal 1404 H. Kemudian ditransliterasi ke dalam huruf Aceh oleh T.A. Sakti.